ਫਿਰੋਜ਼ਪੁਰ ਅਧੀਨ ਆਉਂਦੇ ਥਾਣਾ ਘੱਲ ਖੁਰਦ ਦੇ ਐਸਐਚਓ ਗੁਰਤੇਜ ਸਿੰਘ ਅਤੇ ਸਬ ਇੰਸਪੈਕਟਰ ਜਗਰੂਪ ਸਿੰਘ ਖ਼ਿਲਾਫ਼ ਇੱਕ ਵਿਆਹ ਪਾਰਟੀ ਵਿਚ ਸਰਕਾਰੀ ਰਾਇਫਲਾਂ ਨਾਲ ਫਾਇਰਿੰਗ ਕਰਨ ਵਿਰੁੱਧ ਇੱਕ ਮੁਕੱਦਮਾ ਦਰਜ ਕੀਤੇ ਜਾਣ ਦਾ ਮਾਮਲਾ ਸਾਹਮਣੇ ਆਇਆ ਹੈ।
ਪ੍ਰਾਪਤ ਜਾਣਕਾਰੀ ਅਨੁਸਾਰ ਇਕ ਪੱਤਰ ਡੀਆਈਜੀ ਫਿਰੋਜ਼ਪੁਰ ਰੇਂਜ ਨੂੰ ਦਿੱਤਾ ਗਿਆ ਸੀ ਜਿਸ ਵਿਚ ਦੋਸ਼ ਲਗਾਏ ਗਏ ਸੀ ਕਿ ਉਕਤ ਦੋਨਾਂ ਸਬ ਇੰਸਪੈਕਟਰਾਂ ਵੱਲੋਂ ਇੱਕ ਵਿਆਹ ਪਾਰਟੀ ਵਿਚ ਫਾਇਰਿੰਗ ਕੀਤੀ ਗਈ ਸੀ ਜਿਸ ਦੀ ਸੀਡੀ ਵੀ ਮਿਲੀ ਅਤੇ ਉਸ ਵਿਚ ਦੋਨੋਂ ਫਾਈਰਿੰਗ ਕਰਦੇ ਨਜ਼ਰ ਆਏ ।
ਦੱਸ ਦੇਈਏ ਕਿ ਪਿੰਡ ਠਠੇਰਾ ਵਾਲੀ ਵਿਖੇ ਜਗਰੂਪ ਸਿੰਘ ਸਬ ਇੰਸਪੈਕਟਰ ਦੇ ਲੜਕੇ ਦਾ ਵਿਆਹ ਸੀ ਅਤੇ ਵਿਆਹ ਦੀ ਖੁਸ਼ੀ ਮੌਕੇ ਇੰਸਪੈਕਟਰ ਗੁਰਤੇਜ ਸਿੰਘ ਅਤੇ ਜਗਰੂਪ ਸਿੰਘ ਨੇ ਸਰਕਾਰੀ ਰਾਇਫਲਾਂ ਨਾਲ ਫਾਇਰਿੰਗ ਕੀਤੀ ਅਤੇ ਇਸ ਸਾਰੀ ਘਟਨਾ ਦੀ ਰਿਕਾਰਡ ਹੋ ਗਈ।
ਜਿਸ ਦੇ ਚਲਦੇ ਉਕਤ ਦੋਨਾਂ ਸਬ ਇੰਸਪੈਕਟਰਾਂ ਖ਼ਿਲਾਫ਼ ਇਨਕੁਆਰੀ ਖੋਲ੍ਹ ਦਿੱਤੀ ਗਈ ਅਤੇ ਉਨ੍ਹਾਂ ਖ਼ਿਲਾਫ਼ ਗੁਪਤ ਜਾਣਕਾਰੀ ਅਤੇ ਸੀਡੀ ਦੇ ਆਧਾਰ ਤੇ ਇਹ ਸਾਬਤ ਹੋ ਗਿਆ ਕਿ ਇਨ੍ਹਾਂ ਵੱਲੋਂ ਇਹ ਜੁਰਮ ਕੀਤਾ ਗਿਆ ਹੈ। ਫਿਲਹਾਲ ਦੋਨੋਂ ਸਬ ਇੰਸਪੈਕਟਰ ਪੁਲਸ ਦੀ ਗ੍ਰਿਫਤ ਤੋਂ ਬਾਹਰ ਹਨ। ਹੁਣ ਦੇਖਣਾ ਇਹ ਹੋਵੇਗਾ ਕਿ ਪੁਲਸ ਅਧਿਕਾਰੀਆਂ ਲਈ ਕਾਨੂੰਨ ਦੇ ਹੱਥ ਕਿਸ ਹੱਦ ਤਕ ਲੰਬੇ ਹੁੰਦੇ ਹਨ।
