ਇਜ਼ਰਾਈਲ ਦਾ ਪ੍ਰਧਾਨ ਮੰਤਰੀ ਬਣਨ ‘ਤੇ ਪੀਐਮ ਮੋਦੀ ਨੇ ਨਫਤਾਲੀ ਬੇਨੇਟ ਨੂੰ ਦਿੱਤੀ ਵਧਾਈ

ਨਵੀਂ ਦਿੱਲੀ, 14 ਜੂਨ । ਪ੍ਰਧਾਨਮੰਤਰੀ ਨਰਿੰਦਰ ਮੋਦੀ ਨੇ ਸੱਜੇ ਪੱਖ ਦੀ ਯਾਮੀਨਾ ਪਾਰਟੀ ਦੇ ਨੇਤਾ ਅਤੇ ਵਿਸ਼ੇਸ਼ ਬਲਾਂ ਦੇ ਕਮਾਂਡੋ ਨਫਤਾਲੀ ਬੇਨੇਟ ਨੂੰ ਇਜ਼ਰਾਈਲ ਦੇ ਪ੍ਰਧਾਨ ਮੰਤਰੀ ਬਣਨ ‘ਤੇ ਵਧਾਈ ਦਿੱਤੀ ਹੈ।

ਪ੍ਰਧਾਨਮੰਤਰੀ ਮੋਦੀ ਨੇ ਸੋਮਵਾਰ ਨੂੰ ਟਵੀਟ ਕਰਕੇ ਕਿਹਾ, ਮਹਾਮਹਿਮ ਨਫਤਾਲੀ, ਇਜ਼ਰਾਈਲ ਦੇ ਪ੍ਰਧਾਨ ਮੰਤਰੀ ਬਣਨ ‘ਤੇ ਵਧਾਈਆਂ। ਜਿਵੇਂ ਕਿ ਅਸੀਂ ਅਗਲੇ ਸਾਲ ਕੂਟਨੀਤਕ ਸੰਬੰਧਾਂ ਨੂੰ ਅੱਗੇ ਲੈ ਜਾਣ ਦੇ 30 ਸਾਲਾਂ ਦਾ ਜਸ਼ਨ ਮਨਾ ਰਹੇ ਹਾਂ, ਮੈਂ ਤੁਹਾਡੇ ਨਾਲ ਮੁਲਾਕਾਤ ਕਰਨ ਅਤੇ ਸਾਡੇ ਦੋਵਾਂ ਦੇਸ਼ਾਂ ਦਰਮਿਆਨ ਰਣਨੀਤਕ ਭਾਈਵਾਲੀ ਨੂੰ ਡੂੰਘਾ ਕਰਨ ਦੀ ਉਮੀਦ ਕਰਦਾ ਹਾਂ।

ਇੱਕ ਹੋਰ ਟਵੀਟ ਵਿੱਚ, ਪ੍ਰਧਾਨ ਮੰਤਰੀ ਮੋਦੀ ਨੇ ਇਜ਼ਰਾਈਲ ਦੇ ਪ੍ਰਧਾਨ ਮੰਤਰੀ ਵਜੋਂ ਸਫਲ ਕਾਰਜਕਾਲ ਲਈ ਬੈਂਜਾਮਿਨ ਨੇਤਨਯਾਹੂ ਨੂੰ ਵਧਾਈ ਦਿੱਤੀ। ਉਹ 12 ਸਾਲ ਇਸ ਅਹੁਦੇ ਤੇ ਰਹੇ।

ਮੋਦੀ ਨੇ ਟਵੀਟ ਕੀਤਾ, “ਤੁਸੀਂ ਇਜ਼ਰਾਈਲ ਰਾਜ ਦੇ ਪ੍ਰਧਾਨ ਮੰਤਰੀ ਵਜੋਂ ਆਪਣਾ ਸਫਲ ਕਾਰਜਕਾਲ ਪੂਰਾ ਕਰ ਰਹੇ ਹੋ। ਮੈਂ ਤੁਹਾਡੀ ਅਗਵਾਈ ਅਤੇ ਭਾਰਤ-ਇਜ਼ਰਾਈਲ ਰਣਨੀਤਕ ਭਾਈਵਾਲੀ ਵੱਲ ਨਿੱਜੀ ਧਿਆਨ ਦੇਣ ਲਈ ਤਹਿ ਦਿਲੋਂ ਧੰਨਵਾਦ ਕਰਦਾ ਹਾਂ।

ਧਿਆਨ ਯੋਗ ਹੈ ਕਿ 49 ਸਾਲਾ ਨੇਤਾ ਅਤੇ ਸਾਬਕਾ ਕਮਾਂਡਰ ਬੇਨੇਟ ਨੇ ਸੰਸਦ ਵਿਚ ਬਹੁਮਤ ਹਾਸਲ ਕਰਨ ਤੋਂ ਬਾਅਦ ਐਤਵਾਰ ਨੂੰ ਸਹੁੰ ਚੁੱਕੀ ਸੀ। 2005 ਵਿਚ 14.5 ਕਰੋੜ ਡਾਲਰ ਵਿਚ ਆਪਣਾ ਤਕਨੀਕੀ ਸਟਾਰਟਅਪ ਵੇਚਣ ਤੋਂ ਬਾਅਦ ਨਫਤਾਲੀ  ਰਾਜਨੀਤੀ ਵਿਚ ਦਾਖਲ ਹੋਏ ਸਨ।