PS Mitha
ਚੰਡੀਗੜ੍ਹ, 25 ਮਾਰਚ । ਪੰਜਾਬ ਦਾ ਇਕ ਹੋਰ ਪੰਜਾਬੀ ਗਾਇਕ ਗੈਗਸਟਰਾਂ ਵਿਚਕਾਰ ਉਲਝ ਗਿਆ ਹੈ। ਗੈਗਸਟਰ ਦਵਿੰਦਰ ਬੰਬੀਹਾ ਗਰੁੱਪ ਨੇ ਗਾਇਕ ਮਨਕੀਰਤ ਔਲਖ ਨੂੰ ਜਾਨ ਤੋਂ ਮਾਰਨ ਦੀ ਧਮਕੀ ਦਿੱਤੀ ਹੈ। ਔਲਖ ਨੇ ਪੰਜਾਬ ਪੁਲਿਸ ਨੂੰ ਸਿ਼ਕਾਇਤ ਦੇ ਕੇ ਸੁਰੱਖਿਆ ਦੀ ਮੰਗ ਕੀਤੀ ਹੈ।
ਪੰਜਾਬ ਵਿਚ ਇਸਤੋਂ ਪਹਿਲਾਂ ਵੀ ਕਈ ਕਲਾਕਾਰ ਗੈਂਗਸਟਰਾਂ ਦੇ ਨਾਲ ਵਿਵਾਦ ਵਿਚ ਉਲਝ ਚੁੱਕੇ ਹਨ। ਗਾਇਕ ਮਨਕੀਰਤ ਔਲਖ ਮੂਪ ਰੂਪ ਵਿਚ ਹਰਿਆਣਾ ਦੇ ਫਤਿਹਾਬਾਦ ਦਾ ਰਹਿਣ ਵਾਲਾ ਹੈ। ਇਸ ਸਮੇਂ ਉਹ ਆਪਣੇ ਗਰੁੱਪ ਦੇ ਨਾਲ ਮੁਹਾਲੀ ਵਿਚ ਰਹਿ ਰਿਹਾ ਹੈ।
ਸ਼ੁੱਕਰਵਾਰ ਨੂੰ ਔਲਖ ਨੂੰ ਕਿਸੇ ਨੇ ਫੋਨ ’ਤੇ ਧਮਕੀ ਦਿੱਤੀ। ਜਿਸਨੇ ਉਸਨੂੰ ਗੰਭੀਰਤਾ ਨਾਲ ਨਹੀਂ ਲਿਆ। ਇਸ ਵਿਚਕਾਰ ਗੈਗਸਟਰ ਦਵਿੰਦਰ ਬੰਬੀਹਾ ਗਰੁੱਪ ਨੇ ਇਕ ਪੋਸਟ ਪਾ ਕੇ ਇਸ ਘਟਨਾ ਦੀ ਜਿੰਮੇਵਾਰੀ ਲਈ ਹੈ। ਦਵਿੰਦਰ ਬੰਬੀਹਾ ਗਰੁੱਪ ਨੇ ਕਿਹਾ ਕਿ ਮਨਕੀਰਤ ਔਲਖ ਪੰਜਾਬ ਵਿਚ ਅਮੀਰ ਅਤੇ ਨਾਮੀ ਗਾਇਕਾਂ ਬਾਰੇ ਸੂਚਨਾਵਾਂ ਲਾਰੇਂਸ ਬਿਸ਼ਨੋਈ ਗੈਂਗ ਨੂੰ ਦਿੰਦਾ ਹੈ। ਲਾਰੇਂਸ ਦੇ ਨਾਲ ਸਬੰਧਾਂ ਦੇ ਚਲਦਿਆਂ ਉਹ ਇੰਡਸਟਰੀ ਵਿਚ ਆਪਣਾ ਦਬਦਬਾ ਬਣਾਉਦਾ ਹੈ।
ਧਮਕੀ ਵਿਚ ਕਿਹਾ ਗਿਆ ਹੈ ਕਿ ਗੀਤਾਂ ਜਰੀਏ ਹਥਿਆਰਾਂ ਨੂੰ ਪ੍ਰਮੋਟ ਕਰਨਾ ਸਹੀ ਨਹੀਂ ਹੈ। ਪਹਿਲਾਂ ਵੀ ਚਿਤਾਵਨੀ ਦਿੱਤੀ ਗਈ ਹੈ ਪਰ ਔਲਖ ਬਾਜ ਨਹੀਂ ਆਇਆ। ਉਸਨੂੰ ਚੁਣੌਤੀ ਦਿੰਦਿਆਂ ਗੈਗਸਟਰ ਨੇ ਕਿਹਾ ਹੈ ਕਿ ਹੁਣ ਕਰਵਾ ਕੇ ਦੇਖੋ ਜੇਲ੍ਹਾ ’ਚੋਂ ਫੋਨ। ਹੁਣ ਤੱਕ ਕਦੋ ਦਾ ਸਵਰਗ ਸਿਧਾਰ ਜਾਂਦਾ। ਬਚਦਾ ਰਿਹਾ ਹੈ ਪਰ ਬਚੇਗਾ ਹੁਣ ਵੀ ਨਹੀਂ। ਬੰਬੀਹਾ ਗੈਂਗ ਦੀ ਧਮਕੀ ਤੋਂ ਬਾਅਦ ਮਨਕੀਰਤ ਔਲਖ ਨੇ ਸੁਰੱਖਿਆ ਦੀ ਮੰਗ ਕੀਤੀ ਹੈ। ਪੰਜਾਬ ਪੁਲਿਸ ਨੇ ਮਾਮਲਾ ਦਰਜ ਕਰਕੇ ਅਗਲੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।
